یونس شہید پر
فضا میں بھڑکا وہ ایک شعلہ
فلک پہ کوندی وہ ایک بجلی
فضا میں گونجا وہ ایک نعرہ
شہید یونس کا نام دنیا میں آج پائندہ ہو گیا ہے
حریف پر قہر بن کے ٹوٹا
غضب سے اس کے اماں کہاں تھی
فرار کا تھا نہ کوئی چارہ
مٹا کے دشمن کو میرا شاہین خود فضاؤں میں کھو گیا ہے
شہید یونس کا نام دنیا میں آج پائندہ ہو گیا ہے
وہ پیکر عزم و فخر و ملت
عقاب خصلت دلیر شاہیں
جہاں میں بے مثل اس کی غیرت
تڑپ رہا تھا رگوں میں وہ خوں زمین جس سے بھگو گیا ہے
شہید یونس کا نام دنیا میں آج پائندہ ہو گیا ہے
حیات جاوید موت تیری
تِرے لہو میں وفا کی خوشبو
تِرے وطن پر خدا کی رحمت
بلند پرچم تِرا کہ جس کا ہلال تابندہ ہو گیا ہے
شہید یونس کا نام دنیا میں آج پائندہ ہو گیا ہے
فہمیدہ ریاض
فلائیٹ لیفٹیننٹ یونس حسن شہید ستارۂ جرأت
No comments:
Post a Comment