وہ شہر نبی یا رب اک بار نظر آئے

 عارفانہ کلام حمد نعت منقبت

وہ شہرِ نبیؐ یا رب اک بار نظر آئے

وہ گُنبدِ خضرا کا مینار نظر آئے

دربارِ نبوت میں جو خاک بسر پہنچے

وہ لوگ زمانے کے سردار نظر آئے

وہ حُسن کہ آنحضرت محبوبِ خدا ٹھہرے

وہ رعب کہ لرزیدہ کُہسار نظر آئے

وہ رحمدلی ان کی ہر وقت دعائیں دِیں

مائل بہ جفا جبکہ کُفار نظر آئے

جو حبِ محمدﷺ میں تا حدِ جنوں پہنچے

دیکھا تو وہ دیوانے ہُشیار نظر آئے

جو لوگ ہوئے شامل حضرتؐ کے غلاموں میں

در اصل وہی بندے احرار نظر آئے

دنیا کو نہ ہوتی تھی اپنی بھی خبر پہلے

جب ان سے ملِیں آنکھیں اَسرار نظر آئے

ان کے لبِ اقدس سے اک حرفِ دُعا نکلا

انعام کے ہر جانب انبار نظر آئے

الطافِ پیمبرؐ سے دم بھر میں ہوئے اچھے

وہ دل کہ گُناہوں سے بیمار نظر آئے

ہر سمت زمانے میں اسلام کی ضَو پھیلی

ہر سمت رسالتؐ کے انوار نظر آئے

جو لوگ ہوئے وارث ایمان کی دولت کے

دُنیا کے خزانوں سے بیزار نظر آئے

بے رنگ نظر آئے سب رِند زمانے کے

جب جامِ نبوت کے مئے خوار نظر آئے

یا رب کبھی فاتح کو دیدارِ محمدﷺ ہو

پھر جامِ شہادت سے سرشار نظر آئے

ظہور احمد فاتح