شہید ذرا سوچنا زندگی کس لیے ہے

 شہید 

چاند تک پھیلتی روشنی کس لیے ہے

مِرے ہونٹ پر خُون کی تازگی کس لیے ہے

اندھیرے کے صحرا میں کتنے ہی داغوں کی لو جگمگاتی ہے

اور دُور اُفق پر

ہواؤں کے خاکوں میں

اس رنگ کی لہر سی لہلہاتی ہے

جس کو مِرے خُوں نے زندگی بخش دی ہے

جہاں مِری دھرتی کی سرحد سلامت

جہاں میرے ماتھے کا سُورج ابھی تک ہے روشن

لہو کو پہن کر میں تپتے ارادوں کی شدت سے بے تاب

بڑھتی ہوئی آگ کے اس الاؤ میں اُترا

جہاں اب مرے خُون کی سرخ پھولوں کی تپتی مہک سانس لیتی ہے

اب تک شبِ کربلا ہیں مِرے زخم زندہ

درِ خیبر اب تک مِرے ہاتھ میں ریزہ ریزہ

ابھی تک مِرے خُون سے خاک میں معجزے جاگتے ہیں

اسی خُون سے آج نکھرا ہے گُلشن

یہی خُون اب تک ہواؤں میں گھل کر

تجھے دعوت جام دیتا ہے

اب یہ تِرا نام لیتا ہے

شاید یہاں تُو بھی آئے

اندھیرے کے صحرا میں داغوں کی لو

آگ کا یہ الاؤ

تجھے بھی بلا لے، مگر

میری آواز ابھی تک اندھیرے کی دیوار سے

سر پٹختی ہے

در کھول دو

اس صدا کو سُنو

روشنی آنکھ میں جذب کر لو

ستارے چُنو

اور ستاروں کو سُورج کرو

اور کبھی جب تمہیں چاند تک پھیلتی روشنی کی کرن

اپنی جانب بُلائے

سمجھنا کہ چاند تک پھیلتی روشنی کس لیے ہے

ذرا سوچنا

زندگی کس لیے ہے

سرمد صہبائی