مری آنکھوں کے پیرائے بدل جاتے تو اچھا تھا

 مِری آنکھوں کے پیرائے بدل جاتے تو اچھا تھا

یہ گندے پیرہن اپنے اُجل جاتے تو اچھا تھا

تجاوز کر کے بیٹھے ہیں یہ کب سے میرے سینے میں

یہ چند ارمان بھی دل سے نکل جاتے تو اچھا تھا

بڑا ہی مرتبہ ہوتا ہے اس میں گرنے والوں کا

کبھی تم بھی محبت میں پھسل جاتے تو اچھا تھا

سبھی تو لوگ گرتے ہیں زمانے کے تقاضوں میں

اگر تم بھی ذرا گر کر سنبھل جاتے تو اچھا تھا

لٹا کر زندگی میری مِری سوچوں نےسمجھایا

مِرے اُس دوسری جانب عمل جاتے تو اچھا تھا

اجیرن کر کے رکھ دی ہے ہماری زندگی ساری

یہ دریا اپنی آنکھوں سے نکل جاتے تو اچھا تھا

زمانے میں بڑا ہی شور ہے تیری نگاہوں کا

تمہارے تیر اس دل پر بھی چل جاتے تو اچھا تھا

سنا ہے زندگی کو اک نئی مہمیز دیتے ہیں

مرے جذبے اگر پھر سے مچل جاتے تو اچھا تھا

یونہی رسوائیاں احسان تم نے پلے باندھی ہیں

ذرا حالات میں تم بھی جو ڈھل جاتے تو اچھا تھا

احسان الٰہی احسان