عارفانہ کلام حمد نعت منقبت
زمینِ شعر پہ اک خطِ نعت کھینچا تھا
پھر اُس زمیں کو فلک ہوتے میں نے دیکھا تھا
تھی ایک رات مِری آنکھ نور سے معمور
اس ایک رات نبیﷺ کا سراپا سوچا تھا
خدا احد ہے سو اس کو احد سمجھتے ہیں
امینِ وحئ خدا نے یہی بتایا تھا
کھلے گا حشر کے میدان میں نبیؐ کی قسم
درِ علیؑ پہ جو سجدہ کیا وہ سجدہ تھا
کہیں گیا نہیں اڑ کر حیات کا پنچھی
نبیؐ کے در پہ پرندہ سکوں سے بیٹھا تھا
کسی کو سایہ میسّر نہیں تھا محشر میں
مگر ہمارے سروں پر نبیﷺ کا سایہ تھا
سجا ہوا ہے وہیں پر نشاں محبت کا
رگِ حیات سے دل ان کے در پہ باندھا تھا
کہاں کے صاحبِ ثروت تھے ہم مگر قیصر
ہمارے پاس تھا جتنا نبیﷺ کا صدقہ تھا
قیصر عباس
No comments:
Post a Comment