جب کبھی یاد تری مجھ سے بچھڑ جاتی ہے

 جب کبھی یاد تِری مجھ سے بچھڑ جاتی ہے

سانس تک چلتی ہوئی میری اکھڑ جاتی ہے

میں اسی واسطے باتیں نہیں کرتی تجھ سے

بات جب بڑھتی ہے پھر بات بگڑ جاتی ہے 

مہرباں تیرا تصور نہ ہو جب تک مجھ پہ

جو بھی تصویر بناؤں میں بگڑ جاتی ہے

یہ زمانہ تو کوئی چیز نہیں اس کے آگے

یہ محبت تو مقدر سے بھی لڑ جاتی ہے

میں نے دیکھا ہے کئی بار، کیا ہے محسوس

دل کی بستی تِری نفرت سے اجڑ جاتی ہے

پھر سنبھالا نہیں جاتا ہے تعلق اے زیب

شک کی جب دل میں گِرہ کوئی سی پڑ جاتی ہے 

عروج زیب