نہ چار سو نہ کہیں چرخ ہفتمیں سے ملا

 عارفانہ کلام حمد نعت منقبت

نہ چار سُو نہ کہیں چرخِ ہفتمیں سے مِلا

خِرد کو نُکتۂ توحید شاہِ دیںﷺ سے ملا

جہاں کی دانش و حکمت میں یہ کمال کہاں

شُعورِ زیست مدینے کی سر زمیں سے ملا

بھٹک رہی تھی حقیقت کی جُستجو میں نظر

درِ اِلٰہ مجھے راہِ شاہِ دیںﷺ سے ملا

کِسے خبر تھی کہ ہم کیا ہیں یہ جہاں کیا ہے

یہ راز دولتِ قرآن کے امیں سے ملا

بہارِ عرش کی خُوشبو ہے جس کے دامن میں

وہ لا مکاں کا چمن فرش کے مکیں سے ملا

جو دے سکا نہ مجھے کوئی عالمِ کُن میں

وہ راز خالقِ دوراں کے ہم نشیں سے ملا

مِرے وجود پہ رحمت کا سایہ ہے موجود

یہ مرتبہ مجھے سُلطانِ مُرسلیںﷺ سے ملا

نظر فروز ہے جس میں جمالِ منزلِ عشق

وہ قاعدہ مجھے سردارِ قائدیں سے ملا

جہاں جہاں وہ رُکے اور جہاں جہاں ٹھہرے

نشانِ منزلِ ایماں وہیں وہیں سے ملا

مِرے حضورﷺ کا ہے لُطفِ بے بہا کہ نبیل

نظر کو حُسن بھی محبوبِ عاشقیں سے ملا

نبیل احمد