آتش عشق سے اک حشر بپا ہو جانا

 آتشِ عشق سے اک حشر بپا ہو جانا

اک نظر دیکھتے ہی ان پہ فدا ہو جانا

رات دن سوچنا ان کو ہے عبادت میری

کیسے ممکن ہے عبادت کا قضا ہو جانا

جن کو ہاتھوں سے تراشا ہو بہت محنت سے

ظلم ہے ایسے بتوں کا بھی خدا ہو جانا

زخم اندر کے ہمیشہ سے بہت گہرے ہیں

پھر بھی میں چاہتا ہوں ان کا ہرا ہو جانا

پہلے اک تن سے وہ پوشاک و قبا چھینتے ہیں

پھر انہیں آتا ہے اس سر کی ردا ہو جانا

اس محبت میں میں اب ایسی جگہ پر ہوں جہاں

درد کو آتا ہے آپ اپنی دوا ہو جانا

سارے انسان ہی اب بھیڑیے بن بیٹھے ہیں

راہزن چاہتے ہیں راہنما ہو جانا

آپ کا روٹھنا میرے لیے کچھ ایسے ہے

جیسے مجرم کو عدالت سے سزا ہو جانا

اے محبت! یہ تِری کیسی مسیحائی ہے؟؟

ان کی بس ایک نظر ہی سے شفا ہو جانا

میں سمجھتا ہوں زمانے کی کسی نعمت سے

کم نہیں مجھ کو تِرا ساتھ عطا ہو جانا

تیری آنکھوں میں اگر قید جو حاتم ہو تو

کیوں پھر اس قید سے چاہے گا رہا ہو جانا

بلال حاتم