روش نہ حاکم اعلیٰ وہ اختیار کرے

 روش نہ حاکمِ اعلیٰ وہ اختیار کرے

جو مُنصفی کے تقدس کو تار تار کرے

ہے بدنصیبی کا یہ آخری مقام جہاں

عدو رذیل ہو اور عزتوں پہ وار کرے

جسے یہ لگتا ہے سب کچھ تو مل گیا ہے مجھے

وہ پاس بیٹھے خسارے مِرے شمار کرے

تھکے ہوئے ہیں یہ چوپال کے سبھی افراد

کہانی کار، کہانی میں اختصار کرے

کہا بھی تھا نہ کرے شب کے ہاتھ پر بیعت

جلے گا پھر سے دِیا🪔، تھوڑا انتظار کرے

دُکھے ہوئے ہیں تِری وجہ سے بہت سے دل

خدا تجھے بھی اذیت سے ہمکنار کرے

کومل جوئیہ