اعلان کر رہا ہوں کہ ہوشیار اک طرف

اعلان کر رہا ہوں کہ ہوشیار، اک طرف

معصوم اک طرف ہوں، ریا کار اک طرف

دنیا میں کربلا سے بڑا واقعہ نہیں 

حُبدار اک طرف ہوئے غدّار اک طرف

یہ کس نے آ کے صحنِ حرم میں قدم رکھا

در اک طرف کو ہو گیا، دیوار اک طرف 

پنڈت! ذرا ہمارے ستاروں کا حال دیکھ

ہے پیار اک طرف تو پریوار اک طرف 

تُو آ گیا تو کام چلا گُل فروش کا

بیٹھا ہوا تھا کب سے یہ بیکار اک طرف

سارے حسینؑ ایک طرف جمع ہو گئے

اور ہو گئے تمام وفادار اک طرف

جو سب کو ہے پسند وہ مجھ کو ہے نا پسند

دنیا ہے اک طرف، مِرا معیار اک طرف 

اک سمت ہے یہ غم کہ خُوشی ہے رقیب کی 

اور آپ ہو کے بیٹھے ہیں تیّار اک طرف 

اک امتحان میں ہیں کئی دن سے تتلیاں

پھُول اک طرف ہیں، آپ کے رُخسار اک طرف

نیر مشاعروں میں جو پڑھتا ہے تُو نہ سن

رکھے ہیں تیرے واسطے اشعار اک طرف

شہباز نیر