وہ اجنبی تھا مگر تھا وہ آشنا کی طرح

 وہ اجنبی تھا مگر تھا وہ آشنا کی طرح

مِرے وہ دل میں رہے گا مِری دعا کی طرح

وہ نا خدا تو نہیں تھا مگر سفینے کو

بچا بچا کے وہ لایا تھا ناخدا کی طرح

زباں سے اس کی جو نکلا وہ بن گیا مرہم

کلام اس کا حقیقت میں تھا دوا کی طرح

وہ چل دیا تھا مجھے چھوڑ کر کہاں جانے

جُھلستی ریت پہ اپنے ہی نقشِ پا کی طرح

میں رہ گیا تھا پکڑتا اسے دُھندلکوں میں

نکل گیا وہ بکھری ہوئی صدا کی طرح

میں گِھر گیا تھا اکیلا اُداس جنگل میں

مجھے وہ گھیرے ہوئے تھا کُھلی فضا کی طرح

رہوں گا چاروں طرف اس کے عمر بھر انجم

کبھی میں صبح کی صورت کبھی صبا کی طرح

انجم نیازی