عارفانہ کلام حمد نعت منقبت
کون ہے آشنائے مقامِ نبیﷺ
ہے سرِ عرش و فرش احترام نبی
اس کو حاصل سعادت ہے ایمان کی
قلب پر ثبت ہے جس کے نامِ نبی
کم نصیبوں کو کیوں اس کا شکوہ ہے
جب ودیعت ہو لطفِ دوامِ نبیﷺ
ہے کہاں ان کے نطق و بیاں کی نظیر
زیبِ محراب و منبر کلامِ نبیﷺ
جامِ کوثر چھلکنے ہی کی دیر تھی
ہو گیا سیر ہر تشنہ کامِ نبیﷺ
کر دیا ظلمتِ دہر کو بے نشاں
ایک روشن دِیا ہے نظامِ نبی
دید نظارۂ غیر لازم نہیں
ہو اگر چشم و دل میں قیامِ نبی
مومنوں کے لیے اک نویدِ بہشت
مژدۂ لطفِ حق ہے بنامِ نبیﷺ
ہر گدائے محمدﷺ شہنشاہ ہے
وارثِ خُلد ساقی غلامِ نبیﷺ
عبدالغفور ساقی
ساقی توڑیلوی
No comments:
Post a Comment