میں شاہراہ غم پہ تھا حیراں کھڑا ہوا

 میں شاہراہ غم پہ تھا حیراں کھڑا ہوا

قسمت کی بات ہے کہ تِرا سامنا ہوا

تیری جفا تو ایک بہانہ ہے ورنہ دوست

دل تھا ہمارا روز ازل کا دکھا ہوا

ویرانۂ حیات میں دل کا یہ حال ہے

جیسے خزاں میں پھول اکیلا کھلا ہوا

سرشاری نگاہ سے دل کی شکست تک

ہر مرحلے پہ ایک نیا سانحہ ہوا

تجھ کو یہ غم کہ ہم تِری چاہت میں مر گئے

ہم مطمئن، کہ حق محبت ادا ہوا

صدق طلب تو دیکھیے جب اس کی یاد آئی

مجھ تک خود آ گیا وہ مجھے دیکھتا ہوا

اکرم طاہر