کہ وہ اب تک نہیں پلٹا

 کہ وہ اب تک نہیں پلٹا

اجالا سسکیاں لیتا رہا گھر میں

دِیا دہلیز پر جلتا رہا

جس کو

کسی جاں بخش ساعت میں

مقدس آگ سے روشن کیا، اس نے

وہ انساں دیوتا تھا یا مسیحا تھا

وہ بھولا تو نہیں ہو گا

نہ جانے بے وفا دنیا کے کتنے کام تھے اس کو

نہ جانے کتنے دھندے تھے

کہ وہ اب تک نہیں پلٹا

دِیا تو صبح ہونے تک سدا جلتا ہی رہتا ہے

کوئی اتنا بتا دیتا

کہ وہ جن راستوں میں ہے

وہاں اس کو اندھیرا تو نہیں ملتا؟

ادا جعفری