ممکن ہے کہ مہتاب پیالے سے نکل آئے

 ممکن ہے کہ مہتاب پیالے سے نکل آئے

ہم لوگ تِرے عشق کے ہالے سے نکل آئے

کام آیا نہ جز کوئی جنوں عشق میں ہم کو

ہر دشت میں کچھ اپنے حوالے سے نکل آئے

امکان کی بنیاد پر تعمیر گماں کر

اک شہر اسی دھند کے جالے سے نکل آئے

اک عمر تو حیران رہے گردشِ پا سے

پھر ایک ذرا سنبھلے سنبھالے سے نکل آئے

اس عشق کی تقویم میں ہر کام بڑا کام

ہر جز میں اسی کُل کے حوالے سے نکل آئے

فہیم شناس کاظمی