دل کو اب ایسے محبت کی سزا دیتا ہوں

 دل کو اب ایسے محبت کی سزا دیتا ہوں

ایسا کرتا ہوں کہ اب اس کو بھلا دیتا ہوں

پوچھ بیٹھا جو کوئی مجھ سے قیامت کا سبب

 تیرا بس مِل کے بچھڑ جانا بتا دیتا ہوں

پہلے بھڑکاتا ہوں یادوں کی میں آتش دل میں

خود ہی پھر بیٹھ کے میں اس کو ہوا دیتا ہوں

یاد رکھتا ہوں جو ہوتا ہے ضروری کوئی

جو بھُلاتا ہے اسے میں بھی بھُلا دیتا ہوں

روٹھ کر جو بھی چلا جائے مناتا ہی نہیں

اشک بالکل نہ بہاتا، نہ صدا دیتا ہوں

اب تو مجھ کو بھی چلن آ ہی گیا دنیا کا

میں  بھی اب یار! زمانے کو دغا دیتا ہوں

چھیڑ کر سارے تِرے قُرب میں گزرے قصے

ایسا روتا ہوں کہ پھر سب کو رُلا دیتا ہوں

بیٹھنے میں نے دیا شاخ پہ پنچھی نہ کوئی

مار کے کنکر اسے خود ہی میں اڑا دیتا ہوں

جو بھی کہتا ہے کہ کب عشق نے اُجرت مانگی

اس کو فرہاد کا قصہ میں سنا دیتا ہوں

جب کبھی  قیس کوئی دشت تماشا چاہیے

اس کو پھر تیرے میں کُوچے کا پتہ دیتا ہوں

مجھ کو جب بات سیکھاتا ہے یہ بیٹا میرا

ہاتھ اٹھا کر اسے ڈھیروں میں دعا دیتا ہوں

جاننا چاہو محبت میں اجڑنا کیا ہے؟

اپنا گھر بار تجھے آ میں دیکھا دیتا ہوں

سر اٹھانے نہیں دیتا کسی خواہش کو کبھی

آنکھ دریا ہے، میں دریا میں بہا دیتا ہوں

یاد اکثر ہی چلی آتی ہے ہر شام ڈھلے

سہمے بچے کی طرح ساتھ سُلا دیتا ہوں

دربدر خاک ہی چھانے گی اداسی کب تک

آ تجھے تیرے میں ساجد سے ملا دیتا ہوں

عجیب ساجد