موسم بدل گئے تو پرندے بھی آئیں گے

 موسم بدل گئے تو پرندے بھی آئیں گے

لہروں کے ساتھ ساتھ سفینے بھی آئیں گے

یہ کیا ہوا کہ سرد ہوئی دل کی آگ بھی

سوچا نہ تھا کہ ایسے زمانے بھی آئیں گے

اے وضعِ احتیاط سنبھل، اپنی خیر لے

ہر مرحلے پہ وہم کے سائے بھی آئیں گے

حدِ نگاہ سرخ سمندر ہے، شام ہے

صبحِ خیال سبز جزیرے بھی آئیں گے

لو انکشافِ ذات کے سجتے ہیں آئینے

لیکن فریبِ ذات کے پردے بھی آئیں گے

رگ رگ میں ہے شگفتئ شوق کی ادا

اس کے بدن کی خوشبو کے جھونکے بھی آئیں گے

شیشوں کے ساتھ گھر میں لگا لی ہیں جالیاں

لیکن شمیم دھوپ کے نیزے بھی آئیں گے

مختار شمیم

حرف حرف آئینہ