شوخی نِگہ کے ساتھ تغافل جفا کے ساتھ
عشاق پر ہجوم بلا ہے بلا کے ساتھ
تیرے ستم سے مجھ کو ملا منصب کلیم
اک وجہِ گفتگو نکل آئی خدا کے ساتھ
یارب غلط ہو فہم کج اندیش کا گماں
کچھ کہہ رہا ہے ان سے عدو التجا کے ساتھ
کیوں شوق میں گرائیے ساتھ اپنے شانِ عشق
اغماض بھی ضرور ہے کچھ التجا کے ساتھ
ہم عالمِ خیال میں کچھ بھی نہ خوش ہوئے
ہے رشک غیر یاد لبِ جاں فزا کے ساتھ
آتا ہے بوئے دوست میں کافر بسا ہوا
قاصد بھی اک رقیب ہے اپنا صبا کے ساتھ
کیا ڈھونڈھتے ہو دہر میں انور جمالِ دوست
چندے پھرو چلو کسی مردِ خدا کے ساتھ
انور دہلوی
No comments:
Post a Comment