اسے بتانا کہ میرے ہاتھوں کو سرسراہٹ نے اتنا مفلوج کر دیا ہے

 اسے بتانا

اسے بتانا کہ میرے ہاتھوں کو سرسراہٹ نے اتنا مفلوج کر دیا ہے 

کہ چٹکیاں بے اثر ہوئی ہیں

اسے بتانا کہ میری حساسیت نے بے وقت بے حسی اختیار کی ہے

اسے بتانا کہ خود کلامی کا مرحلہ بھی اسی سے باتوں میں طے ہوا ہے

اسے بتانا کہ اپنے ہونے کا بوجھ اب اس قدر بڑھا ہے 

کہ میرے ہونے کے سر میں چاندی اُگی ہوئی ہے

اسے بتانا کہ میں نے لوگوں سے بات کرنے کو نوحہ خوانی سمجھ لیا ہے

اسے بتانا کہ روشنی کا جواز یوں بے جواز ہے کہ 

میں دیکھنے کی طلب سے دامن چھڑا چکا ہوں

اسے بتانا کہ میری سانسوں کے سارے نیزوں نے 

میرے سینے کو قبرِ اصغر سمجھ لیا ہے

اسے بتانا کہ میرے ہاتھوں کی انگلیوں نے 

خلا کو زخموں سے بھر دیا ہے

اسے بتانا کہ میری آنکھوں کے گرد جو تھے سیاہ حلقے 

وہ اس کے غم کی عظیم نعمت سے سرخ ہونے پہ مطمئن ہیں

اسے بتانا کہ اس کے دکھ کو معاشرے کی بری نظر سے بچا رہا ہوں

اسے بتانا کہ اس کی فطرت کی پیروی میں لگا ہوا ہوں

اسے بتانا کہ اس کے کہنے پہ مسکرانے کی کوششوں میں

میں اپنی آنکھیں بہا چکا ہوں

اسے بتانا کہ اب کسی کی بھی کال سننے کا کوئی مقصد نہیں رہا ہے

اسے بتانا کہ میں نے پچھلے برس سے میسج کا کوئی پیکج نہیں لگایا

اسے بتانا کہ اس نے تحفے میں اک گھڑی جو کہ 

مجھ کو دی تھی وہ اس کے جاتے ہی رک گئی تھی

اسے بتانا کہ وقت میرا رکا ہوا ہے

اسے بتانا کہ اس کے جانے کے بعد مجھ کو 

اس اپنے بھدے وجود سے بھی کوئی شکایت نہیں رہی ہے

اسے بتانا کہ آئینہ دیکھنے کی ہمت نہیں رہی ہے

وہ اس لیے کہ میں ایک آنسو بنا ہوا ہوں

اسے بتانا کہ میری آواز میری چیخوں کا ساتھ دینے سے منحرف ہے

اسے بتانا کہ میرے کانوں میں اس کے جانے کی چاپ 

یوں بس گئی ہے جیسے مِرے مقدر میں وہ نہیں ہے

اسے بتانا کہ اب مجھے بے جواز ہونے کا کرب آرام دے رہا ہے

اسے بتانا کہ دور رہ کر میں اس کے اطراف میں کہیں ہوں

اسے بتانا کہ وہ نہیں ہے تو میں نہیں ہوں

اسے بتانا

اسے مگر کچھ بھی مت بتانا

وہ رو پڑے گا

کاظم حسین کاظم