تِرا خیال بہت دُور لے گیا مجھ کو
زمانہ دیر تلک ڈھونڈتا رہا مجھ کو
تِرے بجائے تِری جستجو کے رستے میں
خیال و خواب کا اک سلسلہ ملا مجھ کو
صبا کے دوش سے لپٹی ہوئی صدا کی طرح
ہر ایک لمحہ اڑاتا ہوا چلا مجھ کو
مِرے نصیب کہ کھُل کر گناہ بھی نہ کیے
ہر ایسے وقت میں یاد آ گیا خدا مجھ کو
وہ تیرا پیار سے مِلنا ہو یا بچھڑنا ہو
ہر ایک واقعہ اک خواب سا لگا مجھ کو
کھِلا جو پھول تو کانٹا سا چبھ گیا جاوید
بہار آنے کا دھڑکا سا لگ گیا مجھ کو
عبداللہ جاوید
No comments:
Post a Comment