اپنا کردار کہانی میں نبھاتے ہوئے میں
جانے کب چُوک گئی درد چھپاتے ہوئے میں
ڈھل گئی رات لیے آس تِرے آنے کی
بُجھ گئی خود بھی دِیا آج بُجھاتے ہوئے میں
اس کو رکھا تو مِری آنکھ میں پچھتاوے تھے
کتنی شاداں تھی تِرا فون اُٹھاتے ہوئے میں
تجھ سے ملتے ہوئے دن گزرے کہ صدیاں گزریں
سوچ میں پڑ گئی تخمینہ لگاتے ہوئے میں
مجھ پہ تھیں سارے زمانے کی نگاہیں لیکن
دیکھتی تجھ کو رہی شعر سناتے ہوئے میں
تُو نے اچھا ہی کیا زندگی! منہ پھیر لیا
تھک گئی تھی تِرا احسان اُٹھاتے ہوئے مَیں
صائمہ اشک نہ دے دیں مِری پلکوں کو کوئی
سہمی سہمی تھی نئے خواب جگاتے ہوئے میں
صائمہ کامران
No comments:
Post a Comment