یہ اب کھلا ہے کہ اتنا غبار تھا مجھ میں

 یہ اب کھُلا ہے کہ اتنا غُبار تھا مجھ میں

اس انتشار سے پہلے قرار تھا مجھ میں

اکٹھے رہتے تھے ہم دو الگ مکانوں میں

میں یار میں تھا مکیں اور یار تھا مجھ میں

میں اس وجود سے نکلا تو مجھ پہ بھید کھُلا

وہ میں ہی تھا جو بہت بے قرار تھا مجھ میں

تجھے فقط مِری آنکھوں کا نم نظر آیا

مگر اک اور بھی گِریہ گزار تھا مجھ میں

مِرے وجود پہ سیلن بھری اُداسی تھی

نجانے کون تھا جو اشکبار تھا مجھ میں

وہ شعر چھیڑتا اور آنکھ بھیگ جاتی مِری

غزل سرا کوئی نوحہ نگار تھا مجھ میں

تِرے بچھڑنے پہ چُپ تھا تِری رضا کے لیے

وہ شخص بھی جو بہت سوگوار تھا مجھ میں

مِرے سکوت نے وحشت سے بھر دیا تھا اسے

نیا نیا کوئی آباد کار تھا مجھ میں

کبھی رہا ہی نہیں خود پہ اختیار شعیب

مِرے سوا ہی کسی کا شمار تھا مجھ میں

شعیب بخاری