تمہیں کیا پتہ مِری سوچ کا مِرے عشق کا مِرے پِیر کا
جو تُو جان لے تو نہ نام لے کسی لیلیٰ، مجنوں یا ہیر کا
تمہیں کیا پتہ مِرے زخم کا مِرے دردِ دل کا یا ہجر کا
جو تُو جان لے تو نہ نام لے کسی جوگی، سَنت، فقیر کا
تمہیں کیا پتہ مِری رات کا مِرے صبح و شام کے روگ کا
جو تُو جان لے تو نہ نام لے کسی آنسو، اشک یا نِیر کا
تمہیں کیا پتہ مِری جان کا، مِری زندگی کے جہان کا
جو تُو جان لے تو نہ نام لے کسی قصۂ بے نظیر کا
تمہیں کیا پتہ مِری فکر کا مِری فہمِ سخنِ کلام کا
جو تُو جان لے تو نہ نام لے کسی درد، مومن و میر کا
آفتاب شاہ
No comments:
Post a Comment