جینے کے لیے اتنی رعایت نکل آئے
اے کاش تِرے لب سے محبت نکل آئے
اک نام لیا ہے تو تِری بستی کے باسی
ہاتھوں میں لیے سنگِ ملامت نکل آئے
یہ عشق کا زِندان بلا لیتا ہے اس کو
جس کا بھی ذرا سا قد و قامت نکل آئے
اے دیدۂ بے تاب ذرا پڑھ کے تو دیکھو
اس ہاتھ میں شاید مِری قسمت نکل آئے
وہ سامنے آ جائے تو آنکھوں پہ کرو ضبط
ایسا نہ ہو آنکھوں سے شکایت نکل آئے
ایسے نہ ٹٹولو کہ مِری آنکھ سے یک دم
منظر کی جگہ عود کے حیرت نکل آئے
مجذوب ثاقب
No comments:
Post a Comment