نہ جانے کب سے یونہی مرکز نظر ہے مرا

 نہ جانے کب سے یونہی مرکزِ نظر ہے مِرا

یہ زندگی کا معمہ کہ دردِ سر ہے مرا

رواں دواں ہے بصد شوق اُس کے گھر کی طرف

یہ ابر پارہ نہیں مرغِ نامہ بر ہے مِرا

یہ آب و گِل بھی مِرے قافلے میں شامل ہیں

کہ دشت ہی نہیں دریا بھی ہمسفر ہے مرا

یہ میرے خواب یہ میرے خزاں رسیدہ خواب

یہی کمائی ہے میری یہی ہُنر ہے مرا

یہ لفظ جن میں لہو کی کشید شامل ہے

یہ صرف لفظ نہیں ہیں یہ سیم و زر ہے مرا

کوئی گلے سے لگائے، کوئی تسلی دے

کہ مجھ سے بڑھ کے شکستہ تو نوحہ گر ہے مرا

یہیں سے پیار کی خوشبو مجھے بلاتی ہے

ہزار کہنہ و ویراں سہی یہ گھر ہے مرا

عباس رضوی