شہر کی بھیڑ میں خود کو کبھی تنہا کرنا
اپنے ہونے کا نہ ہونے کا تماشا کرنا
میں بھی دیکھوں تِری آنکھوں کی فسوں اندازی
اک ذرا میری طرف بھی رخِ زیبا کرنا
کشتئ عمررواں حلقۂ گرداب میں ہے
حوصلہ پھر بھی ہے موجوں کو کنارا کرنا
یہ اجالے تو سبب ہیں مِری رُسوائی کا
روشنی آنکھ میں چُبھتی ہے، اندھیرا کرنا
میرے خوابوں کو سلیقے سے ہنر آتا ہے
رنگ تصویر کا تصویر سے گہرا کرنا
فرصت یک نفس جاں بھی نہیں ہے مسرور
پھر بھی آتا ہے ہمیں قطرے کو دریا کرنا
انس مسرور
No comments:
Post a Comment