تپشِ ہجر کم اک رات تو ہونے دیتا
کاش اک دن کوئی کُھل کر مجھے رونے دیتا
کاش اُمید کی گلیوں میں بھٹکنے والا
اپنے احساس کو پتھر کے کِھلونے دیتا
آ کے ساحل پہ اذیّت تو نہ سہنا پڑتی
اپنی کشتی جو میں طُوفاں کو ڈبونے دیتا
اس جُنوں نے تو کسی کام کا چھوڑا نہ مجھے
ہو رہا تھا جو زمانے میں وہ ہونے دیتا
جس کی قسمت میں فقط خار ہوں اس کو بابر
کوئی کیسے بھلا پھُولوں کے بِچھونے دیتا
بابر جاوید
No comments:
Post a Comment