نہ ہے اجل کی صدا کہیں سے نہ وصل جاناں کی آس کوئی

 نہ ہے اجل کی صدا کہیں سے نہ وصلِ جاناں کی آس کوئی

زمانے بھر میں کہیں نہ ہو گا ہمارے جیسا اداس کوئی

میں ریگزاروں پہ چل کے آیا ہوئے نہیں لب یہ خشک میرے

ہوں مےکدے میں تو ایسا تشنہ بجھا نہ پایا یہ پیاس کوئی

علاج ممکن کچھ اس لیے بھی نہ ہوسکا ہے مریضِ غم کا

ملے ہیں مجھ کو طبیب سارے نہیں ملا غم شناس کوئی

بجا ہے فرقت کا رنج لیکن ہے اک نگاہِ کرم بھی مجھ پر

تُو دور ہوتا ہے جب بھی مجھ سےمجھے بلاتا ہے پاس کوئی

کوئی ہے برتر کوئی ہے کمتر تو صرف اپنے عمل کے بل پر

وگرنہ دنیا میں سب برابر نہ عام کوئی نہ خاص کوئی

جاوید جدون