گھر سے نکل کے شہر کے رستے کو گھورنا
پھر غم زدہ سی نظم کے مصرعے کو گھورنا
دو مشغلے عزیز ہیں اس ہجر زاد کو
بستر پہ لیٹنا، کبھی پنکھے کو گھورنا
ہرگز نہیں ہوں میں نہیں ہوں کوئی اور ہے
پاگل سا عکس دیکھ کے شیشے کو گھورنا
دیوانگی کے خوف سے پھر چیخ چیخ کر
کمرے میں جھانکتے ہوئے بچے کو گھورنا
کس حال جی رہا ہوں میں چاہو جو جاننا
تو دھوپ میں کھڑے ہوئے پودے کو گھورنا
راہبؔ دکھوں کی گرد میں لپٹے ستم ظریف
اشکوں کا بوجھ جھیلتے تکیے کو گھورنا
عمران راہب
No comments:
Post a Comment