اُس نے دھیمے سُروں میں غزل چھیڑ دی
اور ایسا لگا
سانولی شام کے نرم لمحات میں بانجھ ہوتی ہوئی
زرد شاخوں پہ بھی پھول کِھلنے لگے
اُس کی آواز تھی کہ کوئی سحر تھا
خوشبووں سے لدی کشتیوں کے حسیں قافلے
میری بنجر سماعت کے سُونے پڑے
ساحلوں پر مسلسل اُترنے لگے
اُس کی آواز کی نرمگیں روشنی
دھیرے دھیرے سے الہام ہوتی رہی
شام ہوتی رہی
نیلگوں پانیوں کے حسیں گال پر ہونٹ رکھنے کو سورج
ذرا جُھک گیا
اُس نے دھیمے سروں میں غزل چھیڑ دی
وقت تک رُک گیا
میثم علی آغا
No comments:
Post a Comment