تحریر بکے گی کہیں اخبار بکیں گے

 تحریر بکے گی، کہیں اخبار بِکیں گے

اس دور میں کم ظرف قلمکار بکیں گے

واعظ ہوں کہ زاہد، تہِ دستار بکیں گے

اور شیخِ حرم بھی پسِ دیوار بکیں گے

قانون ہو منشی ہو کہ دربار، بکیں گے

یوں ہی رہا تو، وزراء و سردار بکیں گے

انصاف ملے گا نہیں بے کس کو کسی طور

منصف بھی یہاں اب سرِ بازار بکیں گے

رکھیو نہ کسی سے بھی وفا کی کوئی امید

کچھ سِکوں کے لالچ میں سبھی یار بکیں گے

بس دیکھ کے فرعونوں کے دربار کی شوکت

اہل یدِ بیضاء و عصادار بکیں گے

دشمن کو لڑائی کی ضرورت نہ رہے گی

دولت کے عوض لشکر و سالار بکیں گے

ججھکیں گے غلط کو بھی غلط کہتے ہوئے لوگ

آئیں گے وہ دن جب لبِ اظہار بکیں گے

مظلوم کا بہتا ہوا خوں کس کو دکھے گا

ثاقب! یہاں اب دیدۂ دیدار بکیں گے

ثاقب ندیم