تو حاکم ہے تو ان آفات پر رو کیا رہا ہے

 تُو حاکم ہے تو ان آفات پر رو کیا رہا ہے

ہمیں بتلا ہمارے دیس میں ہو کیا رہا ہے

تِرے ہاتھوں پہ ہیں کم سِن لہو کے سُرخ دھبّے

ارے! یہ داغ مِٹنے کے نہیں، دھو کیا رہا ہے

اور اب فصلِ اذیّت کاٹنے میں شور کیسا

اگر بوتے ہوئے سوچا نہیں، بو کیا رہا ہے

گلابی عصمتوں کو نوچ کر بولے درندے

نُچے اُدھڑے بدن میں باقی دیکھو کیا رہا ہے

گلی کوچوں پہ چھائی ہے عزا کی رات، فارس

یہ ماتم کی گھڑی ہے، ہوش کر، سو کیا رہا ہے

رحمان فارس