اب وہ کہتے ہیں مدعا کہیے
سوچتا ہوں کہ نقش کیا کہیے
زندگی زندگی سے روٹھ گئی
ہائے اب کس کو آشنا کہیے
ہے تغافل کا کیوں گلہ ان سے
آہِ سوزاں کو نارسا کہیے
تھرتھراہٹ حیا کی اس رخ پر
رقص نیرنگیٔ صبا کہیے
کھوئی کھوئی ہیں دھڑکنیں دل کی
پھر محبت کی ابتداء کہیے
اتفاقاً یہ آپ کا ملنا
ایک رنگین حادثہ کہیے
نا شناس الم ہو جو ہستی
سچ تو یہ ہے کہ بے مزا کہیے
دشمنِ جاں تو دشمنِ جاں ہے
غمگساروں کو نقش کیا کہیے
مہیش چندر نقش
No comments:
Post a Comment