اعترافِ شکست
ہندوکش کے پہاڑوں کا بیٹا کئی سال تک
سال ایسے کہ جن کا ہر اک لمحہ اک سال ہو
ایک پتھر کی سل پر محبت کا پودا اگانے کی خاطر
کہ اک خوبصورت سی ناری کے دل میں
محبت جگانے کی خاطر
سحر سے اذانِ عشاء
اور عشاء سے سحر
اور پھر شام تک
ہل چلاتا رہا
ہندوکش کے پہاڑوں کا بیٹا مگر
ہائے افسوس
کوئی کرامت نہ دکھلا سکا
ہندوکش کے پہاڑوں کا بیٹا صدائیں لگاتا رہا
اور اک در مسلسل بجاتا رہا
ہاتھ زخمی ہوئے، اور گلا چھل گیا
پر نہ اس پر محبت کا در وا ہوا
ہندوکش کے پہاڑوں کے بیٹے کی ہمت ہوا ہو گئی
اور دلگیر لہجے میں کہنے لگا
میں نے جس در پہ دستک دی، دیوار تھی
جس پہ بس لفظ دروازہ مرقوم تھا
سرشار فقیرزادہ
No comments:
Post a Comment