مثال عصر ہوں یکتائے روزگار ہوں میں

 مثالِ عصر ہوں یکتائے روزگار ہوں میں

خدا نے جس کو تراشا وہ شاہکار ہوں میں

دل اور ذہن کا باہم قتال ہر لمحہ

درونِ جسم یوں میدانِ کارزار ہوں میں

بدلتی فکر بدلتی مِری طبیعت یہ

اس ایک ذات میں دیکھو تو بے شمار ہوں میں

عروج آیا تو اک دن زوال آنا ہے

حضور کب سے یہی کہتا بار بار ہوں میں

اب اس قدر ہوا انسانیت کا خوں ارزاں

امیرِ شہر سن اب تجھ پہ شرمسار ہوں میں

ہزارہا مہ و انجم ہیں میرے سینے میں

دلِ فگار سمجھتا ہے ریگزار ہوں میں

ذرا سی لغزشِ دل پر عتاب کیوں مولا

ازل سے تیرے اوامر کا پاسدار ہوں میں

کھلا جو عقدۂ عہدِ الست، تو جانا

لبِ حیات پہ کاسہ کوئی ادھار ہوں میں

یہ زندگی تو مسلسل طواف لگتی ہے

حصار میں ہوں وصی یا کہ خود حصار ہوں میں

وصی بستوی