نبی کے ساتھ علی کا بھی دھیان رکھتے ہیں

 نبیؐ کے ساتھ علی کا بھی دھیان رکھتے ہیں

ہم ایسے گیانی ہیں جو شدھ گیان رکھتے ہیں

قدم قدم پہ یہ اٹھتے ہیں یا علی کہہ کر

ہمارے بچے کچھ ایسی اٹھان رکھتے ہیں

ارادتاً تو نہیں فطرتاً ہی پہنچیں گے

کہ ہم غدیر کی جانب ڈھلان رکھتے ہیں

پروں میں لمس غدیری ہوا کا رہتا ہے

ہم آسماں سے بھی اونچی اڑان رکھتے ہیں

علی کا ذکر تو گونگوں کے بس کی بات نہیں

وہی کریں گے جو منہ میں زبان رکھتے ہیں

سنبھالتے ہیں ولایت کے پھول ہم ایسے

خیال کھیت کا جیسے کسان رکھتے ہیں

لہو اگلتے ہیں دشمن علی کے ذکر سے یوں

کہ جیسے منہ میں بنارس کا پان رکھتے ہیں

نبیؐ کا عشق بھی ہے اور علی کی الفت بھی

ہم اس جہان میں دونوں جہان رکھتے ہیں

چلے ہی آئیں گے شاید علی بھی میثم بھی

دیارِ عشق میں ہم بھی دکان رکھتے ہیں

غدیرِ خم میں گھلی روشنائی سے ثاقب

قلم کے جسم کو ہر دم جوان رکھتے ہیں

عباس ثاقب