جنہیں خیال میں لائیں تو جگمگائے سخن

 جنہیں خیال میں لائیں تو جگمگائے سخن

اُنہیں کے نام سے آباد ہے سرائے سخن

ہمارے شعر میں کچھ خواب سانس لیتے ہیں

ہمارے شعر نہیں ہیں فقط برائے سخن

کوئی تو ہو جسے آنکھوں سے ہمکلام کروں

ہیں چند باتیں مِرے پاس ماورائے سخن

سخن وروں پہ خدا کی قسم وہ دھبہ ہے

جو جھوٹے نام کی خاطر خرید لائے سخن

ہم اپنی بات کے پکے ہیں قول کے سچے

گر اس کو شک ہے تو آئے اور آزمائے سخن

پتہ چلا کہ انہیں شاعری سے رغبت ہے

سو ہم بھی کاسۂ لب میں اٹھا کے لائے سخن

سخنوری نے ہمیں معتبر کِیا ہُوا ہے

ہمارا فخر ہے شہباز نسخہ ہائے سخن

شہباز نیر