گھونسلہ چھوڑ گیا جب سے پرندہ اپنا

 گھونسلہ چھوڑ گیا جب سے پرندہ اپنا

پیڑ کو سایہ بھی اچھا نہیں لگتا اپنا

ہم کہ اک عمر چلے ایک ہی رستے پہ مگر

آخرِ کار لیا راستہ اپنا اپنا

جس قدر لوگ جتاتے ہیں حقوق اوروں پر

اس قدر بھولتے جاتے ہیں فریضہ اپنا

اب کہاں کھوج لگائیں کہ کہاں سے آیا

تیر جس نے بھی چلایا، کوئی ہو گا اپنا

ایسے اب ہوں میں تِرا سارے کا سارا، جیسے

پہلے ہوتا تھا کبھی سارے کا سارا اپنا

میں نے تو اپنے ستارے میں تجھے دیکھ لیا

غور سے تُو بھی ذرا دیکھ ستارہ اپنا

دیکھیے اب کے محبت ہمیں لے جائے کہاں

دشت ہی اپنا ہے اس بار نہ دریا اپنا

نعیم عباس ساجد