تیری آنکھوں نے جزیرے جو بنائے ہوئے ہیں

 تیری آنکھوں نے جزیرے جو بنائے ہوئے ہیں

ہم انہیں موجِ حوادث سے بچائے ہوئے ہیں

میرے ہی نام سے منسوب کہانی ہو گی

سارے کردار مِرے خوں میں نہائے ہوئے ہیں

یہ پرندے جو دمِ صبح کہیں نکلے ہیں

گھونسلے اپنے پروں پر ہی اٹھائے ہوئے ہیں

گردشِ وقت ٹھہر تجھ سے بھی نپٹیں گے ابھی

ابھی طوفان سے ہم آنکھ ملائے ہوئے ہیں

اس جہاں میں بھی جو رُسوا ہوں تو حیرت کیا ہے

ہم ہیں وہ لوگ جو جنت سے بھگائے ہوئے ہیں

سیکھ لو ہم سے زمیں نرم بنانے کا ہنر

ہم نے صحراؤں میں بھی پھول کھلائے ہوئے ہیں

وصی بستوی