در بدر حسرت تعمیر لئے پھرتے ہیں

 در بدر حسرتِ تعمیر لیے پھرتے ہیں

پاؤں میں ایک ہی زنجیر لیے پھرتے ہیں

ہجر ہے دشت ہے وحشت ہے بیابانی ہے

کتنے موسم تِرے دِلگیر لیے پھرتے ہیں

تجھ کو شاید نہیں معلوم کہ ہم آنکھوں میں

کس لیے ایک ہی تصویر لیے پھرتے ہیں

بس یہی عجز ہے کُل اپنا اثاثہ بھائی

یہ جو ہم جرأتِ تقصیر لیے پھرتے ہیں

اہلِ دنیا کا ہے پیمانہ زر و سیم یہاں

اور ہم اہلِ سخن میر لیے پھرتے ہیں

یہ مقدر نہیں جو ہم کو لیے پھرتا ہے

بلکہ یہ ہم ہیں جو تقدیر لیے پھرتے ہیں

درد کی رات ہے اور ایک اداسی یونس

زندگی! ہم یہی جاگیر لیے پھرتے ہیں

یونس امین