فیض بخشی کی ہے کیا شان ترے کوچہ میں

فیض بخشی کی ہے کیا شان تِرے کوچہ میں

مور بن جائے سلیمان ترے کوچہ میں

رُوح تو رہتی ہے ہر آن ترے کوچہ میں

آئے کیوں کر تن بے جان ترے کوچہ میں

آ نہیں سکتا وہاں، اور نہ بُلا سکتا ہوں

رات دن رہتا ہے بس دھیان ترے کوچہ میں

کیا عجب ہے کہ بنے صورت مجنوں لیلیٰ

چیر کر اپنا گریبان ترے کوچہ میں

مسکن رُوح مِرا بعد فنا ہو گا وہیں

دفن ہو یا نہ ہو اے جان ترے کوچہ میں

خاک پر نقشِ کفِ پا تِرے ہووے کیوں کر

فرش ہے دیدۂ حیران ترے کوچہ میں

چھوڑ دروازہ تِرا جائیں کہاں ہم خاموش

جان تو کر دئیے قربان ترے کوچہ میں

شاہ خاموش صابری

معین الدین حسینی چشتی صابری