ترے کیے کا زمانہ مجھ سے حساب لے گا

 تِرے کیے کا زمانہ مجھ سے حساب لے گا

کہ تیرا کیا ہے تجھے تو کوئی بھی بخش دے گا

میں اپنے بچوں کو خود پڑھاؤں گا اور ایسے

کہ کچھ کتابوں کا کوئی مطلب نہیں رہے گا

ہمارے پہلے بنانے والے تو مٹ گئے ہیں

ہمیں دوبارہ بنانے والوں کا کیا بنے گا

حقیر میں بھی نہیں ہوں اپنے بڑوں سے کہنا

مِرا بھی شجرہ کسی پیمبر سے جا ملے گا

مِری نظر سے گزرتے منظر کو چھو بھی لو اب

یہ وقت کب تک تمہاری خاطر رکا رہے گا

یہ دل تو کچھ بھی نہیں ہے اس کی ہنسی کے آگے

وہ رو بھی دے گا تو ساری دنیا خرید لے گا

کسے خبر تھی میں جس کو دنیا پڑھا رہا ہوں

مِرا وہ بیٹا مِرا جنازہ غلط پڑھے گا

ضیا مذکور