اے مالک مختار ہر اک کام سے پہلے

عارفانہ کلام حمدیہ کلام

اے مالکِ مختار ہر اک کام سے پہلے

لیتی ہوں تِرا نام ہر اک نام سے پہلے

دنیا کی نظر سے کسی انجام سے پہلے

چل دور نکل جائیں کہیں شام سے پہلے

ہم نے تو چھپا رکھے تھے گہرائی میں آنسو

آنکھوں میں اتر آئے تِرے نام سے پہلے

سندیش ہی آیا نہ ہی آئی کوئی چِٹھی

وہ خود ہی چلا آیا ہے پیغام سے پہلے

کچھ صبر کرو شور بھی گونجیں بھی سنو گے

خاموشی ہے چھائی ہوئی کہرام سے پہلے

پھر لوٹ کے چوکھٹ پہ نہیں آؤں گا تیری

وہ روز قسم لیتا رہا شام سے پہلے

منصف ہو تمہی حق ہے تمہیں رائے زنی کا

کیوں فیصلہ کرتے نہیں الزام سے پہلے

یادوں کے محلات ضیا بار رہیں بس

دل اپنا جلاتی میں رہی شام سے پہلے

الماس مِرے رب کا کرم خاص ہے مجھ پر

شہرت جو ملی مجھ کو مِرے کام سے پہلے

الماس کبیر جاوید