وہ ایک نام جو سرمایۂ حیات بھی ہے

عارفانہ کلام نعتیہ کلام

وہ ایک نام جو سرمایۂ حیات بھی ہے

وہ ایک ذات جو محبوبِ کائنات بھی ہے

ہر ایک رُخ سے ہے کامل حضورؐ کی سیرت

اجل کا ذکر بھی ہے زندگی کی بات بھی ہے

پہنچ سکا نہ کوئی اور مصطفیﷺ کے سوا

وہاں کہ ختم جہاں حدِّ کائنات بھی ہے

ہزار صبحیں تصدّق ہیں جس کی عظمت پر

تریؐ حیات میں شامل وہ ایک رات بھی ہے

نویدِ خلد یہاں ہر قدم پہ ملتی ہے

نبیﷺ کی راہگزر ہی رہِ نجات بِھی ہے

درِ رسولﷺ پہ سجدہ گزارنے والو

بجز خدا کوئی حلاّلِ مشکلات بھی ہے؟

عبث ہے خواب میں ارمانِ دیدِ شاہِ امم

دل و نگاہ میں ربطِ مواصلات بھی ہے

میں کس سے پوچھوں یہ اعجاز مصطفیٰؐ کے سوا

کہ میرا شعر کوئی وجہِ التفات بھی ہے

اعجاز رحمانی