یادوں کا فنجان بھرا ہے

 یادوں کا ٭فنجان بھرا ہے

دُور ہوا میں ایک پرندہ کُرلایا ہے

میں زخمی پَر سینک رہا ہوں

٭چاکر، ٭ہیبو، ٭جاڈو، تینوں بول رہے ہیں

سارا عالم بول پڑا ہے

٭حانی چپ کی چادر سر پر اوڑھ رہی ہے

٭بنگو گُم سُم دیکھ رہا ہے

یادوں کا فنجان بھرا ہے

دور کہیں وادی میں بھیڑیں اپنی سرحد بھول چکی ہیں

٭سمّو بے خُود بھاگ رہی ہے

سمّو ریوڑ ہانک رہی ہے

"وہ آتی ہے"

٭نَڑ سُر کی آواز فضا کو دُہراتی ہے

٭مست کا کیا ہے

مست ہوا میں گدلے ڈھیلے پھینک رہا ہے

بستی تک سیلاب آیا ہے

یادوں کا فنجان بھرا ہے

میر ساگر رحمان

٭فنجان: پیالہ، کپ

٭چاکر: میر چاکر اعظم رند بلوچ، 

٭ہیبو: میر ہیبتان المعروف ہیبو بلیدی قبیلے کے سردار تھے

٭جاڈو: جاڈو جلب

٭حانی: سمو/ہیر کی طرح کا نسوانی کردار

٭بنگو: کوئٹہ کے شمال میں واقع ایک پہاڑ

٭سمۤو: سمو مری قبیلے کی کلوانی شاخ سے تعلق رکھنے والی خوبصورت مٹیار

٭نڑ سر: بلوچی بانسری نما ساز

٭مست: معروف بلوچی شاعر طوق علی مست شیرانی المعروف مست توکلی، سمو کے عاشق