تری نگاہ کرم ہے تو پِھر کمی کیا ہے

 تِری نِگاہِ کرم ہے تو پِھر کمی کیا ہے

تِرے نثار مجھے فکرِ زِندگی کیا ہے

عجب شئے ہے محبت کا جذبۂ رنگِیں

پِھر اس کے بعد بِساطِ غم و خوشی کیا ہے

مِری نظر ہے بہارِ چمن کی جلوہ شناس

میں جانتا ہوں مآلِ شگفتگی کیا ہے

بہت بلند مقامِ حیات ہے ہمدم

زمانہ ساز نگاہوں کو آگہی کیا ہے

نِگاہِ اہلِ زمانہ پہ کاش کُھل جائے

کہ ایک مرگِ مسلسل ہے زِندگی کیا ہے

چھلک رہے ہیں تمہاری نگاہ کے ساغر

پِھر اس کے بعد تمنائے میکشی کیا ہے

الجھ رہے ہیں فریبِ نِشاط میں جو حسن

سمجھ سکیں گے وہ کیا غم کی زِندگی کیا ہے

حسن چشتی