اک نہ اک موسم امکان چلا آتا ہے

 اک نہ اک موسمِ امکان چلا آتا ہے

ہجر جاتا ہے تو مہمان چلا آتا ہے

لوگ لاتے ہیں اسیری کی فقط یادیں گھر

مِرے ہمراہ تو زندان چلا آتا ہے

بار برداری پہ مامور ہوا ہوں جب سے

ہر کوئی بے سر و سامان چلا آتا ہے

ساتھ لے جاتی ہے ہر صبح کہیں ویرانی

رات کو ملنے بیابان چلا آتا ہے

آپ کی یاد ہو، بارش ہو، ملاقاتی ہو

ہر کوئی کرنے پریشان چلا آتا ہے

چوڑیاں سبز، قبا سرخ، گلابی آنچل

یار! لڑکی ہے کہ گلدان چلا آتا ہے

بھولتے ہیں تجھے ہم لوگ بڑی مشکل سے

اور تُو پھر سے مِری جان چلا آتا ہے

قیس پابندِ مضافاتِ جنوں ہے اب بھی

دشت چھوڑے بھی تو ملتان چلا آتا ہے

ضمیر قیس

ضمیر حسن