ضبط یہ درد کی جاگیر نہیں ہو سکتی

 ضبط یہ درد کی جاگیر نہیں ہو سکتی

کارگر اب کوئی تدبیر نہیں ہو سکتی

جب مِرا جہدِ مسلسل پہ یـقیں پختہ ہـے

نامرادی مِری تقدیر نہیں ہو سکتی

نیک ہو یا کہ بُرا ہے یہی فطرت کا اصول

کسی انجام میں تاخیر نہیں ہو سکتی

رکھ کھلی آنکھ سے اے دوست عمل کی بنیاد

خواب میں شوق کی تعمیر نہیں ہو سکتی

ہو بہو نرگسِ شہلا ہے تِری آنکھوں کی

اس سے بہتر کوئی تفسیر نہیں ہو سکتی

یہ وہی نقشِ وفا ہے یہ وہی چہرہ ہے

یہ کسی اور کی تصویر نہیں ہو سکتی

کبھی پُر عزم رہِ حق کـے مسافر کے لیے

مصلحت پاؤں کی زنجیر نہیں ہو سکتی

معاف کرنا جو لیے پھرتـے ہیں دو دو چہرے

مجھ سے ان لوگوں کی توقیر نہیں ہو سکتی

دل دُکھایا نہ کبھی تُو نے کسی کا حسنی

کم از کم یہ تِری تقصیر نہیں ہو سکتی

غلام حسن حسنی