ہے عکس گیسو و رخ اکبر کہاں کہاں

 عارفانہ کلام حمد نعت منقبت سلام

ہے عکسِ گیسو و رخِ اکبرؑ کہاں کہاں​

سُنبل کہاں کہاں ہے، گُلِ تر کہاں کہاں​

کوفے میں، کربلا میں، بقیعہ میں، طوس میں​

مدفوں ہوئے بتولؑ کے دلبر کہاں کہاں​

گُلزار میں، جناں میں، ختن میں، تتار میں​

پھیلی ہے نگہتِ گلِ حیدرؑ کہاں کہاں

​گُل میں، شفق میں، لعل میں، خُورشیدِ صبح میں​

ہے رنگِ خونِ کشتۂ خنجر کہاں کہاں​

صفّین میں، جمل میں، احد میں، تبوک میں​

تنہا لڑے ہیں حیدرِؑ صفدر کہاں کہاں​

فرقِ عدو میں، سینے میں، جوشن میں، زین میں​

در آئی ذُوالفقارِ دو پیکر کہاں کہاں​

بستی میں، جنگلوں میں، ترائی میں، کوہ میں​

شہؑ کو لیے پھرا ہے مقدر کہاں کہاں​

غُربت میں، گھر میں، قبر میں، محشر میں اے دبیر​

آئے مدد کو ساقئ کوثر کہاں کہاں​

​

مرزا دبیر

سلامت علی دبیر