حسین آپ کے افکار سے تعلق ہے

 عارفانہ کلام حمد نعت منقبت

حُسینؑ آپ کے افکار سے تعلق ہے

سو ہر یزید کے انکار سے تعلق ہے

ہمارے گھر پہ جو لہرا رہا ہے حق کا علَم

ہمارا ایک علَم دار سے تعلق ہے

ہم اِس لیے تو شفا بانٹتے ہیں لوگوں میں

ہمارا عابدِ بیمار سے تعلق ہے

ہم اپنے سر میں نہ کیوں خاکِ کربلا ڈالیں

ہمارا شہرِ عزادار سے تعلق ہے

یزیدِ وقت لرزتا ہے اِس لیے ہم سے

ہمارا حیدرِ کرّارؑ سے تعلق ہے

ہماری قبر کے کتبے پہ یا حُسینؑ لکھو

کہ اُن کا حشر کے دربار سے تعلق ہے

علیؑ کا نعرہ لگا کر بہشت میں جاؤ

علیؑ کے نعروں کا اُس پار سے تعلق ہے

ہم اس لیے تو مناتے ہیں جشنِ غم واصف

ہمارے غم کا بھی غم خوار سے تعلق ہے

جبار واصف